Një sulm ajror izraelit në Gazë goditi shtëpinë e një mjekeje të premten, duke vrarë nëntë nga dhjetë fëmijët e saj. Lajmi u bë i ditur nga spitali ku ajo punon në Khan Younis. Siç shkruan BBC, spitali Nasser raportoi se një nga fëmijët e Dr. Alaa al-Najjar dhe bashkëshorti i saj mbijetuan, por mbetën të plagosur. Kirurgu britanik Graeme Groom, i cili punon në spital, tha se kishte operuar djalin e saj 11-vjeçar që mbijetoi.
Një video e verifikuar nga BBC tregonte trupat e djegur të fëmijëve duke u nxjerrë nga rrënojat e sulmit në Khan Younis. Po ashtu BBC thotë se ka kërkuar koment nga ushtria izraelite, por ende nuk ka një përgjigje zyrtare.
Kriza humanitare po përkeqësohet, me mungesa të rënda ushqimi dhe uji. OKB ka paralajmëruar se popullsia e Gazës është në rrezik nga uria, pasi ndihmat mbeten të pamjaftueshme. Edhe pse Izraeli hoqi pjesërisht bllokadën, sasia e ndihmës që hyn në Gazë është shumë më e vogël se ajo e nevojshme.
Ky konflikt ka sjellë vuajtje të mëdha, me zhvendosje, uri dhe shkatërrim që prek miliona njerëz. Komuniteti ndërkombëtar vazhdon të bëjë thirrje për rritjen e aksesit humanitar dhe një zgjidhje për krizën.
