“Shqipëria humbi sot Fortlumturinë e tij, Kryepiskopin e Tiranës, Durrësit dhe të gjithë Shqipërisë, Prof. Dr. Anastasin, udhëheqësin shpirtëror dhe figurën e shquar të Kishës Ortodokse Autoqefale të Shqipërisë”, kështu shprehet Kreu i Shtetit Bajram Begaj pas vdekjes së Janullatos.
Përmes një postimi në Facebook, Presidenti thotë se Kryepeshkopi e ka udhëhequr Kishën me mençuri, përkushtim dhe dashuri për njerëzit. Më tej, thekson se prej kontributit të tij është krijuar një rrugë e re për besimin ortodoks shqiptar.
“Në këtë moment të dhimbshëm, shprehim ngushëllimet tona më të thella për Kishën dhe për gjithë besimtarët, që humbën atin dhe kryebariun e tyre, një udhëheqës të dashur dhe të nderuar. Trashëgimia e Fortlumturisë së tij do të mbetet gjithmonë e gjallë në zemrat e atyre që e nderuan dhe e donin. Lutemi që Zoti t’i dhurojë prehjen në tendat e të drejtëve dhe qoftë kujtimi i tij i përjetshëm!”, thotë Begaj në mesazhin e tij të ngushëllimit.
Janullatos ndërroi jetë në moshën 95 vjeçare, pas më shumë se 3 javësh i shtruar në një spital në Athinë.
