Policia e Tiranës ka intensifikuar kontrollet në vendin e ngjarjes ku u vra 50-vjeçari, Alfred Dedja, pasi autorit të krimit, Julian Gjoshi, i është kërkuar sërish të ndihmojë në gjetjen e armës së krimit. Sipas deklaratës së tij, arma është hedhur në shkurre pranë lokalit ku ndodhi vrasja, dhe pas kontrolleve të djeshme, forcat e rendit do të rikthehen përsëri sot për të vijuar kërkimet.
Për të ndihmuar në gjetjen e armës, sot do të angazhohen edhe Forca Kombëtare e Sigurisë (FKS). Nëse arma nuk gjendet gjatë ditës, autoritetet mund të detyrohen të marrin në pyetje më thellë Julian Gjoshi dhe të kërkojnë nga ai të tregojë vendndodhjen e saktë të armës që ka përdorur për të ekzekutuar vrasjen. Ai ka deklaruar se ka kryer krimin për shkak të ofendimeve të përsëritura që viktima, Alfred Dedja, i kishte bërë gjatë një periudhe kohore.
Ai ka rrëfyer gjatë dëshmisë së tij se krimin e ka kryer për shkak të ofendimeve të përsëritura që viktima 50-vjeçar i bënte atij në mënyrë të përsëritur. Madje ka theksuar se dikur e “ka mbajtur me bukë”.
Policia dhe Prokuroria hetojnë edhe për pista të tjera të mundshme për krimin e ndodhur të dielën e 1 Dhjetorit në lokal “Kështjella”, në Ndroq. Gjoshi u dorëzua një ditë pas krimit, teksa makina e tij “Benz” u gjet te “Shkëmbi i Kavajës” në Durrës, aty ku qëndroi për një natë në hotel.
Gjoshi rezulton se është kunati i Altin Hajrit, ky i fundit pronar i “Golden” dhe një ndër personat më të kërkuar të drejtësisë, për organizimin e rrëmbimit dhe zhdukjes së Jan Prengës në vitin 2020. Gjoshi është person me precedentë penalë të mëparshëm, ashtu sikurse dhe viktima.
