Një raund i ri masash tregtare nga Shtetet e Bashkuara pritet të trazojë marrëdhëniet ndërkombëtare ekonomike. Presidenti Donald Trump ka njoftuar planet për vendosjen e tarifave të reja ndaj importeve nga Kina, Bashkimi Evropian, Kanadaja dhe Meksika, duke argumentuar se këto masa janë të nevojshme për të rikthyer ekuilibrin ekonomik dhe për të mbrojtur interesat amerikane.
Sipas deklaratave të presidentit, një taksë prej 10% ndaj importeve nga Kina mund të hyjë në fuqi së shpejti. Në një dalje nga Shtëpia e Bardhë, Trump ka lidhur këtë masë me shqetësimet për trafikun e fentanilit, i cili, sipas tij, depërton në Shtetet e Bashkuara përmes kufijve me Kanadanë dhe Meksikën.
Një tjetër paketë tarifash, këtë herë prej 25%, synon të prekë importet nga Kanadaja, Meksika dhe Bashkimi Evropian, duke nisur nga 1 shkurti. Presidenti kritikoi këto vende për atë që ai e quajti “ekonomi të çekuilibruar” në raport me SHBA. “Bashkimi Evropian ka qenë shumë i padrejtë ndaj nesh për një kohë të gjatë,” u shpreh Trump, duke nënvizuar se tarifat janë një mënyrë për të arritur barazinë tregtare.
Ndërkohë, Kanadaja dhe Meksika kanë reaguar ndaj këtij paralajmërimi, duke treguar një qëndrim më të moderuar. Presidentja e Meksikës paralajmëroi se vendi i saj është i gatshëm të marrë masa reciproke ndaj SHBA, duke shtuar se marrëveshja tregtare e njohur si USMCA (Marrëveshja e Tregtisë së Lirë SHBA-Meksikë-Kanada) nuk mund të ndryshohet deri në vitin 2026. Ky qëndrim duket se synon të shmangë një përshkallëzim të mëtejshëm të tensioneve.
Analistët paralajmërojnë se këto masa mund të shkaktojnë sfida të reja për ekonominë globale, ndërsa vëzhguesit pritet të ndjekin nga afër reagimet e Bashkimit Evropian dhe të aktorëve të tjerë ndërkombëtarë.
