Një ngjarje kriminale ka mëngjesin e sotëm të datës 19 dhjetor në kryeqytet, ku një automjet është shkatërruar nga shpërthimi i një lënde plasëse.
Sipas njoftimit të Policisë së Tiranës, në orët e para të mëngjesit të datës së sotme, 19.12.2025, rreth orës 03:20, në zonën e Selitës së Vogël, dyshohet se është hedhur një sasi lënde plasëse në automjetin e shtetasit D. J., rreth 39 vjeç, i cili kishte parkuar makinën në oborrin e banesës së tij. Policia thekson se si pasojë, pati vetëm dëme materiale, pa persona të lënduar.
Hetuesit po verifikojnë gjithashtu edhe aktivitetin e bashkëshortes së D. J., e cila rezulton të jetë një nga administratorët e Agjencisë së Pasurive të Sekuestruara dhe Konfiskuara në Ministrinë e Brendshme. Dhe kjo mbetet një pistë e mundshme hetimi.
D.J. është nipi i Thoma Janos, i cili ka mbajtur më parë pozicionin e zv/Prokurorit të Përgjithshëm dhe ka qenë shef i sektorit të përgjimeve në këtë institucion. Th.J. është larguar së fundmi nga sistemi i drejtësisë për shkak të moshës së pensionit. Hetuesit nuk përjashtojnë mundësinë që puna e ish-prokurorit të lidhet me ngjarjen.
Siç njofton Policia, grupi hetimor është në vendngjarje dhe po punon për sqarimin e rrethanave të rastit, si dhe për identifikimin dhe kapjen e autorit/ëve, duke nisur menjëherë hetimet për zbardhjen e motivit dhe autorëve të ngjarjes.
Shpërthimi ka qenë i fuqishëm, por fatmirësisht nuk ka patur të lënduar. Megjithatë, dëmet materiale në automjetin e shtetasit D. J. janë të konsiderueshme.
Policia nënvizon se hetimet janë në vijim dhe se çdo informacion i siguruar nga qytetarët mund të ndihmojë në zbardhjen e rastit. “Grupi hetimor po punon intensivisht për të identifikuar autorin/ët dhe për të kapur personat përgjegjës”, thuhet në njoftimin zyrtar të Policisë.
