Dy të huaj nga Turqia, një grua 27-vjeçare dhe një burrë 31 vjeç kanë rënë në prangat e policisë, pasi dyshohet se shfrytëzonin për prostitucion dy vajza gjithashtu të huaja.
Sipas asaj që bën të ditur policia janë proceduar penalisht edhe dy vajzat që ushtronin prostitucionin në një apartament në Rrugën e Barrikadave.
Blutë kanë sekuestruar 2500 Euro dhe 200 Dollarë të dyshuara të përfituara nga kjo veprimtari e paligjshme, si dhe 3 celularë.
“Shfrytëzonin 2 shtetase të huaja, për prostitucion, kapen dhe vihen në pranga një 31-vjeçar dhe një 27-vjeçare (shtetas turq). Procedohen penalisht 2 shtetaset që ushtronin prostitucion. Sekuestrohen shuma parash të dyshuara të përfituara nga kjo veprimtari e paligjshme dhe 3 celularë. Specialistët e Seksionit për Hetimin e Trafiqeve të Paligjshme, si rezultat i veprimeve hetimore të kryera në drejtimin e Prokurorisë, pas informacioneve të siguruara nga inteligjenca policore, për një rast të prostitucionit, kanë organizuar dhe finalizuar operacionin e koduar “Foreigners”.
Nga veprimet hetimore ka rezultuar se shtetasit turq M. H. dhe S. B., në bashkëpunim me njëri-tjetrin, shfrytëzonin për prostitucion një shtetase nga Turqia dhe një shtetase nga Azerbajxhani, të cilat e ushtronin prostitucionin në një apartament në Rrugën e Barrikadave. Në përfundim të veprimeve, u arrestuan shtetasja M. H., 27 vjeçe dhe shtetasi S. B., 31 vjeç, të dy banues në Tiranë, për veprën penale “Shfrytëzimi i prostitucionit”, kryer në bashkëpunim. Gjithashtu, nisi procedimi në gjendje të lirë për 2 shtetaset që ushtronin prostitucion. Në cilësinë e provës materiale u sekuestruan 2500 euro dhe 200 dollarë të dyshuara të përfituara nga kjo veprimtari e paligjshme, si dhe 3 celularë”, njofton Policia.
Materialet procedurale iu referuan Prokurorisë së Tiranës, për veprime të mëtejshme.
