Ambasada e Shteteve të Bashkuara në kryeqytetin irakian Bagdad është goditur nga dronë dhe raketa, në atë që konsiderohet sulmi i dytë i tillë që nga nisja e konfliktit aktual në rajon, sipas BBC.
Autoritetet nuk kanë dhënë ende detaje të plota mbi dëmet apo viktimat.
Ndërkohë, Emiratet e Bashkuara Arabe kanë rihapur hapësirën ajrore, pasi e kishin mbyllur përkohësisht për shkak të kërcënimeve me raketa dhe dronë nga Irani.
Situata e sigurisë në rajon mbetet e paqëndrueshme, ndërsa tensionet vazhdojnë të përshkallëzohen.
Presidenti amerikan Donald Trump ka vijuar thirrjet ndaj vendeve të tjera, veçanërisht aleatëve të NATO-s, që të kontribuojnë në sigurimin e Ngushticës së Hormuzit, një rrugë kyçe për transportin global të naftës.
Megjithatë, kancelari gjerman Friedrich Merz është shprehur se ky konflikt “nuk është çështje për NATO-n”, ndërsa vetë aleanca ka deklaruar se aleatët kanë shtuar tashmë masat e sigurisë në Mesdhe.
Në një zhvillim paralel, liderët e Britanisë së Madhe, Kanadasë, Francës, Gjermanisë dhe Italisë kanë publikuar një deklaratë të përbashkët, ku paralajmërojnë se një ofensivë e madhe tokësore izraelite në Liban do të kishte “pasoja shkatërruese humanitare”.
Ndërkohë, lufta ka hyrë në javën e tretë, duke rritur presionin mbi administratën amerikane për të marrë vendime kyçe që mund të përcaktojnë drejtimin e mëtejshëm të konfliktit dhe ndikimin e tij global.
