Protesta studentore në Serbi ka marrë një kthesë të re, pasi studentët kanë bllokuar ndërtesën e Radiotelevizionit të Serbisë (RTS) në Beograd, si dhe disa televizione të tjera publike në qytete të ndryshme. Studentët e Fakultetit të Mjekësisë, të cilët udhëhoqën këtë aksion, thanë se bllokada do të zgjasë për 22 orë dhe se nuk do të lejojnë hyrjen e askujt në ndërtesë, por punonjësit e RTS-së mund të largohen lirisht.
Hyrja e RTS-së mbeti e bllokuar gjatë gjithë natës nga rreth 100 protestues, ndërsa policia ndodhej brenda ndërtesës. Përmes këtyre protestave, studentët po kërkojnë që qeveria të marrë përgjegjësinë për rrëzimin tragjik të një strehe betoni në stacionin hekurudhor të Novi Sadit më 1 nëntor 2024, ku humbën jetën 15 persona.
Policia serbe ka paralajmëruar se do të ndërhyjë vetëm nëse protestuesit përpiqen të hyjnë në ndërtesat e televizioneve me forcë. Megjithatë, situata ka degjeneruar në përleshje, ku një polic është plagosur rëndë në sy. Presidenti serb, Aleksandar Vuçiq, ka akuzuar protestuesit për dhunë, duke i quajtur “anëtarë të pleniumit bolshevik”. Nga ana tjetër, raportimet e mediave dhe pamjet e publikuara në rrjetet sociale sugjerojnë se polici i plagosur mund të jetë qëlluar aksidentalisht nga kolegët e tij me uniformë.
Protestat pritet të vazhdojnë, ndërsa tensionet mes studentëve dhe qeverisë serbe po përshkallëzohen gjithnjë e më shumë.
