Fundshkurti do të sjellë një fenomen të veçantë astronomik, të njohur si “parada planetare”, ku të shtatë planetët e sistemit tonë diellor do të jenë të dukshëm njëkohësisht në qiell. Kjo dukuri, ndonëse e rrallë, ndodh kur planetët rreshtohen në një linjë të dukshme nga Toka.
Edhe pse të gjithë planetët do të jenë teknikisht të pranishëm në qiell në të njëjtën kohë, jo të gjithë do të jenë lehtësisht të dallueshëm. Afërdita, Jupiteri dhe Marsi do të jenë më të lehtë për t’u vëzhguar me sy të lirë, duke ofruar një spektakël të mrekullueshëm për adhuruesit e astronomisë. Nga ana tjetër, Mërkuri, Neptuni dhe Saturni do të shfaqen afër horizontit në orët e para të mbrëmjes, me Neptunin dhe Saturnin që do të kërkojnë mjete optike për t’u vëzhguar. Urani, gjithashtu, do të jetë shumë i zbehtë dhe do të nevojiten dylbi apo teleskop për ta parë qartë.
Sipas NASA-s, paradat planetare ku janë të dukshëm katër ose pesë planetë ndodhin çdo disa vjet, por një rreshtim i plotë me shtatë planetë është një fenomen i rrallë. Herën tjetër që kjo dukuri do të ndodhë do të jetë në vitin 2040.
Një fenomen i ngjashëm u regjistrua edhe në qershorin e kaluar, por atëherë vetëm dy planetë ishin të dukshëm me sy të lirë. Ndërsa në janar të këtij viti, gjashtë planetë mund të vëzhgoheshin në qiell, katër prej tyre pa pajisje speciale. Tani, këtij rreshtimi i është shtuar edhe Mërkuri, duke e bërë natën e fundit të shkurtit një mundësi të jashtëzakonshme për vëzhguesit e yjeve dhe astronomët amatorë.
