Opozita ka kërkuar tre orë leje për vijimin e mosbindjes civile, e cila synon të bllokojë disa akse dhe nyje kryesore në kryeqytet. Partia Demokratike njoftoi policinë se do të protestojë nga ora 17:00 deri në orën 20:00, por blutë kanë refuzuar lejen për bllokimin e kryqëzimeve kryesore të Tiranës.
Nëpërmjet një reagimi publik, policia ka theksuar se bllokimi i rrugëve konsiderohet vepër penale dhe dënohet deri në tre vite heqje lirie, por gjithsesi ka garantuar të drejtën e tubimit pa cënuar lëvizshmërinë e qytetarëve.
Siç ndodhi më 26 Nëntor, opozita synon sërish të bllokojë disa akse dhe nyje kryesore rrugore në Tiranë, si unaza e vogël, rrethrrotullimi i Zogut të Zi, ura pranë xhamisë në Rrugën e Elbasanit, sheshi “Wilson” dhe segmentin nga pallati me shigjeta drejt Rrugës së Kavajës.
Ndërkohë, për të garantuar lëvizjen e lirë të mjeteve, policia ka marrë një sërë masash për devijimin e trafikut në akse të tjera.
Gjatë protestës së fundit që u mbajt rreth një muaj më parë, policia procedoi penalisht 64 persona, përfshirë edhe 15 deputetë të opozitës.
