Mijëra protestues kundër kryeministrit sllovak Robert Fico! Arsyeja kryesore, qëndrimi i këtij të fundit ndaj Rusisë dhe dhënia fund e ndihmës ushtarake për Ukrainën. Siç e dimë, së fundmi Fico është treguar kritik ndaj Bashkimit Evropian dhe madje është zotuar të bllokojë anëtarësimin e Ukrainës në NATO.
Presidentin e Ukrainës Volodymyr Zelenskyy e ka cilësuar “armik”, me argumentin se Kievi ndaloi furnizimet me gaz rus në Sllovaki dhe vende të tjera evropiane.
Këto e të tjera, kanë bërë turma të tëra të aktivizohen në dhjetëra qytete e qyteza të Sllovakisë, duke e cilësuar Ficon një politikan pro-rus. 
Vala e fundit e tubimeve antiqeveritare u nxit prej udhëtimit të Ficos në Moskë për bisedime me Presidentin Vladimir Putin, që duhet theksuar, është ndër të rrallat herë që një udhëheqës në vendet e BE-së shkon atje që prej agresionit rus në Ukrainë në 2022-in.
Frika se Fico mund ta largojë vendin nga familja europiane dhe NATO kanë shtuar zemërimin te qytetarët. “Sllovakia është Evropë,” brohoritën ata në Bratislavë.
Fico, ka qenë përgjatë viteve një figurë që i ka ndarë njerëzit në dy “kampe”. Herë pas here ka shkaktuar tensione në masë për shkak të politikës së tij të jashtme.
