Autoritetet në Shkodër po përballen me një çështje të ndërlikuar pas vrasjes së 19-vjeçarit Paulin Preka, ngjarje e cila mbetet ende një mister. Ndërsa fillimisht u dyshua për një konflikt të çastit, policia ka zgjeruar hetimet në drejtime të tjera, përfshirë mundësinë që viktima të ketë qenë dëshmitar i një aktiviteti të paligjshëm.
Të afërmit e të ndjerit kanë deklaruar se ai nuk kishte konflikte apo përfshirje në çështje kriminale, por megjithatë, policia po analizon me kujdes komunikimet e fundit në telefonin e tij, me shpresën se mund të gjendet ndonjë pistë që çon në zbardhjen e ngjarjes.
Trupi i pajetë i të riut u gjet në oborrin e banesës së tij në fshatin Guci e Re, me një plagë fatale në gjoks. Ishte xhaxhai i tij ai që njoftoi autoritetet. Banorët e zonës nuk kanë raportuar lëvizje të dyshimta në momentin e ngjarjes, por një kamera sigurie pranë shtëpisë është sekuestruar nga policia dhe po analizohet për të identifikuar çdo informacion të vlefshëm.
Paulin Preka jetonte me të atin dhe merreshin me blegtori në zonën e Dukagjinit, por ai vizitonte shpesh edhe banesën e familjes në Guci e Re, ku edhe humbi jetën tragjikisht. Ndërkohë, hetimet vijojnë me intensitet për të zbuluar autorët dhe motivet e këtij krimi.
