Presidenti i SHBA-së, Donald Trump, është informuar mbi një gamë të gjerë opsionesh ushtarake dhe operacionesh të fshehta që mund të përdoren kundër Iranit, thanë dy zyrtarë të Departamentit Amerikan të Mbrojtjes, sipas “CBS News”.
“Skenarët e paraqitur përfshijnë sulme me raketa me rreze të gjatë veprimi në rast të një ndërhyrjeje të drejtpërdrejtë ushtarake amerikane”, sipas burimeve.
Megjithatë, zyrtarët e Pentagonit kanë marrë në konsideratë gjithashtu operacione kibernetike dhe fushata psikologjike që synojnë udhëheqjen dhe sistemet e komunikimit të Iranit.
Tensionet janë rritur më tej pasi Trump njoftoi dje në mbrëmje se do të vendoste një tarifë prej 25% për mallrat nga vendet që tregtojnë me Iranin.
Vendimi vjen ndërsa grupet e të drejtave të njeriut thonë se më shumë se 600 protestues ishin vrarë në tre javët e fundit të protestave antiqeveritare në Iran.
Ndërkohë, ministri i Jashtëm i Iranit tha se Teherani ishte i hapur për bisedime me Uashingtonin, por theksoi se vendi mbetej “i përgatitur për luftë”.
Burimet thonë se ekipi i sigurisë kombëtare i Trump pritet të zhvillojë një takim në Shtëpinë e Bardhë për të diskutuar hapat e mundshëm kundër Iranit, megjithëse ende nuk është e qartë nëse vetë presidenti do të marrë pjesë.
Më herët, Trump paralajmëroi se ushtria amerikane po shqyrtonte “opsione shumë të forta” nëse dhuna kundër protestuesve iranianë vazhdonte.
Ai gjithashtu pretendoi se udhëheqësit iranianë ishin përpjekur ta kontaktonin atë për të negociuar, por shtoi se SHBA-ja mund të ishte e detyruar të vepronte para çdo takimi.
Kriza ekonomike e Iranit, e shkaktuar nga rënia e monedhës kombëtare dhe keqmenaxhimi financiar, ka thelluar pakënaqësinë popullore dhe e ka shndërruar situatën në një krizë legjitimiteti për Udhëheqësin Suprem Ajatollah Ali Khamenei.
Sipas Shtëpisë së Bardhë, përfaqësuesit iranianë kanë kontaktuar gjithashtu privatisht të dërguarin special të SHBA-së, Steve Witkoff, ndërsa mesazhet zyrtare publike të Teheranit mbeten të ndryshme nga ato të përcjella në fshehtësi.
Zëdhënësja e Shtëpisë së Bardhë, Caroline Leavitt, paralajmëroi se presidenti Trump nuk do të hezitonte të përdorte forcën ushtarake nëse e konsideronte të nevojshme.
Burimet theksuan se çdo përgjigje ushtarake amerikane kishte të ngjarë të mbështetej kryesisht në fuqinë ajrore, dhe se po shqyrtohen mënyra për të paralizuar komandën dhe komunikimet ushtarake iraniane.
Ndërkohë, SHBA-ja i ka bërë thirrje qytetarëve të saj në Iran të largohen ose të kenë një plan daljeje pa ndihmën e qeverisë amerikane.
Nga ana tjetër, Ajatollah Khamenei ka akuzuar SHBA-në për “mashtrim” dhe përdorimin e “mercenarëve tradhtarë”, duke vlerësuar protestat pro-qeveritare të organizuara së fundmi në disa qytete iraniane.
Sipas mediave shtetërore, turma të mëdha njerëzish kanë marrë pjesë në këto tubime, ndërsa “BBC Persian” raportoi se qytetarët kishin marrë mesazhe që i ftonin të merrnin pjesë në protesta pro-qeveritare dhe i paralajmëronin të mos bashkoheshin me demonstratat kundër regjimit.
Vendosja e tarifave të reja amerikane mund ta përkeqësojë më tej situatën ekonomike të Iranit, i cili tashmë po përballet me inflacion të lartë dhe çmime ushqimesh që rriten deri në 70%.
Kina mbetet partnerja më e madhe tregtaree Iranit, e ndjekur nga Iraku, Emiratet e Bashkuara Arabe, Turqia dhe India.
