Një sulm ajror rus mbi një burg në rajonin juglindor të Zaporizhias ka shkaktuar të paktën 17 viktima dhe mbi 80 të plagosur, sipas autoriteteve ukrainase. Goditja ndodhi të hënën mbrëma në koloninë korrektuese të Bilenkivskës, e cila u qëllua me katër bomba ajrore të drejtuara.
Sipas Shërbimit të Ekzekutimit Penal të Ukrainës, të paktën 42 të burgosur janë shtruar në spital me plagë të rënda, ndërsa edhe 40 të tjerë, përfshirë një punonjës të institucionit, kanë pësuar lëndime. Sulmi shkatërroi mensën e burgut dhe dëmtoi ndërtesat administrative, por perimetri i sigurisë mbeti i paprekur dhe nuk ka raportime për arratisje.
Forcat Ajrore të Ukrainës deklaruan se gjatë natës Rusia lëshoi dy raketa balistike Iskander-M dhe 37 dronë të tipit Shahed. Mbrojtja ajrore ukrainase arriti të rrëzojë 32 prej tyre.
Zyrtarët ukrainas e cilësuan sulmin si një akt kriminal, duke theksuar se goditja e infrastrukturës civile si burgjet përbën krim lufte.
Ndërkohë, sulme të tjera janë regjistruar edhe në rajonin e Dnipros. Në qytetin Kamianske, dy persona humbën jetën dhe pesë të tjerë u plagosën, përfshirë një grua shtatzënë që ndodhet në gjendje të rëndë, pasi raketat goditën një ndërtesë banimi dhe disa institucione shëndetësore, përfshirë një maternitet.
Në zona të tjera të Dnipros, përfshirë distriktin Synelnykivskyi dhe komunitetin Velykomykhailivska, raportohen edhe dy viktima të tjera dhe disa të plagosur nga sulmet me dronë dhe bomba ajrore.
