Në një intervistë për rrjetin televiziv ballkanik Insider, raportuesi për vendin tonë në Parlamentin Europian, Andreas Schieder, vlerëson vullnetin politik të Shqipërisë për reformat e integrimit.
“Shqipëria ka një plan ambicioz jo vetëm për hapjen e grupkapitujve, por edhe për mbylljen e tyre deri në vitin 2027. Duhet të them se procesi i hapjes së kapitujve është i rëndësishëm, por mbyllja e tyre është akoma më e rëndësishme. Zbatimi i reformave është edhe më i vështirë, por shqiptarët janë shumë të përkushtuar politikisht për të ecur më shpejt përpara”, tha Schieder.
Schieder i referohet reformës në drejtësi.
“Në Shqipëri kanë bërë një reformë jashtëzakonisht të vështirë, por tashmë kanë një sistem gjyqësor modern. Ata kanë ngritur SPAK-un që po heton njerëz nga të gjitha partitë politike, ata janë hetuar, madje disa kanë përfunduar në burg”, u shpreh ai.
Schieder thekson se situata ekonomike në rajon është e ngjashme, por dallimi qëndron tek qeverisja dhe vullneti politik për reforma.
“Të gjithë në rajon, serbë, malazezë, shqiptarë, maqedonas, duan të punojnë shumë, të gjithë duan t’i dërgojnë fëmijët e tyre në shkolla të mira. Aty ka njerëz të guximshëm, por dallimi mes këtyre shteteve është tek vullneti politik për reforma në qeverisje”, vijoi raportuesi.
