Për afro 2 miliardë myslimanë në mbarë botën, Ramazani është një periudhë e rëndësishme e përkushtimit shpirtëror, lutjes dhe solidaritetit. Ky muaj i shenjtë, i cili është i nënti në kalendarin hënor islamik, nuk ka një datë të qëndrueshme në kalendarin Gregorian, pasi ndjek ciklin e hënës dhe fillimi i tij përcaktohet nga shfaqja e gjysmëhënës së parë pas hënës së re.
Këtë vit, Hëna e re u vu re të enjten, ndërsa gjysmëhëna e parë do të jetë e dukshme të premten në mbrëmje, duke shënuar nisjen e Ramazanit. Megjithatë, për shkak të ndryshimeve në shikueshmërinë e hënës në rajone të ndryshme, data e fillimit ndryshon. Në Arabinë Saudite, Ramazani nis të shtunën, më 1 mars, ndërsa në vende si Indonezia, ai do të fillojë të dielën, më 2 mars. Muaji i shenjtë përfundon më 30 mars, me festën e Fitër Bajramit, e cila nis menjëherë pas shfaqjes së hënës së re.
Ramazani është një periudhë e veçantë për myslimanët, gjatë së cilës ata agjërojnë nga agimi deri në perëndim të diellit, një praktikë e ndjekur për më shumë se 1400 vjet. Agjërimi ndërpritet çdo mbrëmje me iftarin, një vakt që shpesh shoqërohet nga familjarë dhe miq. Përveçse një periudhë e përkushtimit fetar, Ramazani shënohet me tradita të ndryshme në vende të ndryshme, me disa shtete që rregullojnë apo reduktojnë oraret e punës për të lehtësuar angazhimet fetare të qytetarëve të tyre.
