Kryeministri Edi Rama e sheh teknologjinë dhe Inteligjencën Artificiale në veçanti një bekim, sidomos për Shqipërinë. Këtë të premte ai tha se ato mund të përdoren për të fituar kohën që kemi humbur për të ngushtuar hendekun me vendet e zhvilluara. Si shembull mori instrumentin e krijuar bashkë me Microsoft për të përshpejtuar në mënyrë eksponenciale procesin e negociatave.
Sipas tij, ky mjet shërben duke transferuar në një kohë reale të gjithë trupin e ligjeve të BE-së që duhet të adaptohen në legjislacionin tonë. Kjo sipas kreut të qeverisë i siguron Shqipërisë që të garantojë kohën fizike dhe ta reduktojë atë brenda kornizës së vendosur bashkë me Komisionin Europian, që negociatat të mbyllen në 2027. Prandaj momenti për Ramën është historik e si i tillë, Shqipëria nuk duhet ta humbë mundësinë, por ta shfrytëzojë që të integrohet sa më parë në BE.
“Ky është një moment historik për Shqipërinë në të gjithë kuptimin e fjalës sepse është hapur një dritare e një mundësie që nuk vjen dy herë për t’u bërë pjesë e BE-së duke shfrytëzuar një hapësirë kohore tejet të shkurtër. Shpejtësia e procesit që ne po përparojmë në këtë kornizë është më e larta ndonjëherë krahasuar me të gjitha vendet, por jo sepse ne po e bëjmë shumë mirë detyrën çka nuk diskutohet, por sepse BE është shumë i interesuar për shpejtësinë. Është momenti historik i përputhjes së rrethanave tona të brendshme me rrethanat e sotme të BE-së. Janë ata po kaq të dëshiruar saç jemi ne që ky proces të mbyllet dhe Shqipëria të bëhet anëtare e BE-së. Ne kemi detyrimin të mos e humbim këtë mundësi, të mos humbim asnjë ditë sepse nëse nuk e realizojmë këtë kapërcim epokal në këtë hapësirë kohore, dritarja mund të mbyllet dhe të fillojë historia nga e para, siç e keni parë të zhvillohet kur nuk ishte kjo përputhje e interesave dhe kur pavarësisht se ne bënim detyrën tonë dilte një vend atje dhe thoshte, jo pavarësisht se KE rekomandonte çeljen e negociatave Shqipëria bllokohej nga një veto këtu, nga një veto atje”, tha Rama.
Kryeministri i bëri komentet gjatë nënshkrimit të marrëveshjes mes TEDA-s dhe kompanisë izraelite H.A.P.I Advanced Technologies LTD. Rama bëri me dije se investimi që do të realizohet në Zonën e Lirë Ekonomike të Tiranës është një bashkëpunim strategjik i një rëndësie të veçantë.
“Bëhet fjalë për dhjetëra miliona Euro për të krijuar një “bankë” të dhënash dixhitale që do të jetë në harkun e 18 muajve pas marrjes së lejes së zhvillimit baza më e madhe të dhënave dixhitale të rajonit tonë dhe do të ofrojë një platformë shumë tërheqëse për kompani të mëdha në fushën e teknologjisë dixhitale dhe përkatësisht në zhvillimin e Inteligjencës Artificiale”, tha Rama.
Sipas tij ajo do të krijojë mundësi edhe për të rinjtë që të kenë një punë të mirëpaguar në Tiranë. Sipas tij, filozofia e kompanive të tilla nuk lidhen me koston e krahut të punës, por cilësinë e saj.
“Ky është një lajm shumë i mirë për të rejat dhe të rinjtë që janë të investuar në dije në fushën e teknologjisë”, tha ai.
Kujtojmë se TEDA Tiranë është një projekt strategjik për të nxitur investimet në teknologji dhe industri, duke ofruar lehtësira për investitorët në sektorë si teknologjia, automotive, inovacioni dhe prodhimi.