Ish-kryetarja e Gjykatës së Lartë të Nepalit, Sushila Karki, është zgjedhur kryeministrja e përkohshme e vendit, pasi protestat vdekjeprurëse kundër korrupsionit rrëzuan qeverinë, sipas BBC.
Karki, 73 vjeçe u betua gjatë një ceremonie të shkurtër, duke u bërë gruaja e parë që drejton kombin e varfër Himalayan, pasi u arrit një marrëveshje me udhëheqësit e protestave.
Më shumë se 50 persona u vranë në përleshjet me policinë gjatë protestave masive të kësaj jave, të nxitura nga ndalimi i platformave të mediave sociale.
Ndalimi u hoq të hënën – por deri atëherë protestat ishin shndërruar në një lëvizje masive.
Turma të zemëruara i vunë flakën të martën ndërtesave të parlamentit dhe qeverisë në kryeqytetin Katmandu, duke e detyruar kryeministrin KP Sharma Oli të jepte dorëheqjen.
Këshilltari për shtyp i presidentit Ram Chandra Poudel konfirmoi dje se Karki do të bënte betimin e marrjes së detyrës në mbrëmje.
Marrëveshja midis presidentit dhe udhëheqësve të protestës u arrit pas disa ditësh konsultimesh. Në bisedime u përfshinë edhe ekspertë ligjorë.
Parlamenti u shpërbë dje në mbrëmje dhe u njoftua se zgjedhjet e përgjithshme do të zhvilloheshin më 5 mars të vitit të ardhshëm.
Pritet që Karki të emërojë ministrat në kabinetin e saj brenda pak ditësh.
Ajo konsiderohet gjerësisht si një figurë e pastër dhe udhëheqja e saj e qeverisë së përkohshme po mbështetet nga udhëheqësit studentorë – e ashtuquajtura lëvizja “Gjenerata Z”.
Por, kabineti i saj do të përballet me sfida të shumta, duke përfshirë rivendosjen e rendit dhe ligjit, rindërtimin e parlamentit dhe ndërtesave të tjera kyçe që u sulmuan, duke i siguruar protestuesit e “Gjeneratës Z” që duan ndryshim – dhe të tjerë në Nepal që kanë frikë se demokracia e saj e re dhe rendi kushtetues mund të prishen.
Një detyrë tjetër kyçe do të jetë nxjerrja para drejtësisë e personave përgjegjës për dhunën.
Emërimi i Karki është një kompromis që rezulton nga bisedimet që u ndërmjetësuan nga shefi i ushtrisë së Nepalit këtë javë.
Ushtria e Nepalit ende po patrullon rrugët e Katmandusë – ndërsa vendi po përballet me trazirat më të këqija ndër dekada.
Kufizimet u hoqën vetëm për një kohë të shkurtër për t’u lejuar banorëve të blinin artikuj thelbësorë.
Protestat u shkaktuan nga vendimi i qeverisë, javën e kaluar për të ndaluar 26 platforma të mediave sociale, duke përfshirë WhatsApp, Instagram dhe Facebook.
