Përplasjet në Serbi kanë vijuar për të dytën ditë radhazi, teksa kundërshtarët dhe mbështetësit e qeverisë serbe janë përballur në rrugë, secila palë duke organizuar demonstratat e veta, pas më shumë se nëntë muajsh protestash të vazhdueshme kundër presidentit Aleksandar Vuçiç.
Siç shkruan Reuters, mbrëmjen e së mërkurës, në qytetin verior të Novi Sadit, mbështetësit e presidentit dhe protestuesit kundër qeverisë hodhën flakadanë dhe objekte të tjera kundër njëri-tjetrit, çka kërkoi ndërhyrjen e forcave speciale të policisë.
Në një konferencë për shtyp të mbajtur vonë të mërkurën, Vuçiçi i shoqëruar nga ministri i Brendshëm Ivica Daçiç, tha para gazetarëve se 16 oficerë policie dhe rreth 60 mbështetës të SNS-së, janë plagosur gjatë protestës në Novi Sad. Ai gjithashtu akuzoi fuqi të huaja të paidentifikuara për organizimin e trazirave dhe premtoi arrestime.
“Personat që kanë shkelur ligjin do të ndalohen… Sonte kemi shmangur një skenar katastrofik të planifikuar nga dikush nga jashtë,” u shpreh Vuçiç.
Pamjet e transmetuara nga televizioni privat “N1″ tregonin flakadanë dhe fishekzjarre të hedhura ndaj protestuesve në Novi Sad nga drejtimi i zyrave të partisë së Vuçiçit. Në pamje duken gjithashtu protestues kundër qeverisë, disa me fytyra të përgjakura, të cilët deklarojnë se mbështetësit e Vuçiçit i kanë sulmuar me shkopinj dhe shufra gome.
Lëvizja opozitare “Move-Change” tha se përgjegjës për përplasjet janë mbështetësit e Vuçiçit.
“Sulmet ndaj qytetarëve me mjete piroteknike përbëjnë shkelje të të drejtës për jetën dhe për protestë” thuhet në një deklaratë të kësaj lëvizjeje.
Protestuesit fajësojnë korrupsionin për shembjen e çatisë së stacionit hekurudhor në Novi Sad dhe kërkojnë zgjedhje të parakohshme, me shpresën për ta larguar Vuçiçin dhe partinë e tij nga pushteti pas 13 vitesh.
Studentë, opozita dhe organizata kundër korrupsionit kanë akuzuar Vuçiçin dhe aleatët e tij për lidhje me krimin e organizuar, dhunë ndaj kundërshtarëve dhe kufizim të lirisë së medias, akuza të cilat ata i mohojnë.
Mbrëmjen e së mërkurës, studentët që udhëheqin protestat u bënë thirrje qytetarëve që të mblidhen për të protestuar para zyrave të SNS-së në qytetet kryesore të Serbisë, përfshirë Beogradin, Novi Sadin, Kragujevcin, Çaçakun dhe Nishin, pasi disa protestues u plagosën në përplasjet që ndodhën në qytetin Vrbas të martën në mbrëmje.
