Pas paralajmërimit të djeshëm të Ambasadës Amerikane, 1 prill, që ngriti alarmin se grupe të lidhura me Iranin mund të sulmojnë godina të lidhura me SHBA-të, sheshe dhe vende publike në Shqipëri, Antiterrori në Policinë e Shtetit, ka nisur intensifikimin e planit të masave.
Siç raporton gazetari i Klan News, Besar Bajraktaraj, njësia e Antiterrorit po zhvillon takime edhe me përfaqësues të Ambasadës Amerikane dhe asaj izraelite.
Mësohet se plani i masave ishte aktivizuar më herët, por pas njoftimit të ambasadës, ka një rritje të vleresimit të situatës.
Në fokus të planit të masave janë kryesisht Ambasada amerikane, ajo izraelite, godina e muxhahedinëve në Manëz, por dhe sheshe të mëdha publike në vend.
Në kuadër të masave nga ana e Policisë së Shtetit është vlerësuar të ketë një shtim të forcave policore në terren.
Gjithashtu pjesë e grupit të punës në planin e masave është edhe SHISH ku në bashkëpunim me Antiterrorin pritet që të kenë në fokus më shumë godinat diplomatike.
