Nga 1 Janari i vitit të ardhshëm paga minimale e detyrueshme do të jetë 500 Euro. Kryeministri ka zbuluar në komunikimin “sy më sy” vendimin që qeveria e tij do të ndërmarrë pas zgjedhjeve të 11 Majit.
“Pagën minimale e kishim 157 Euro e kemi 400 Euro dhe me vendim në Qershor do ta bëjmë 500 Euro, që do të hyjë në efekt nga Janari 2026.”
Një tjetër premtim që Rama zbulon është ai për strehimin.
“E di sa dyert janë hapur dhe familjet kanë hyrë në shtëpi, o të reja fare, o të rindërtuara, pra të riparuara, ose të rigjeneruara me sistem kursimi energjetik, etj. 35 mijë e beson dot kë të ti? 35 mijë dyert janë hapur, 35 mijë çelësa janë rrotulluar, për të hyrë në një shtëpi ku me shpenzimet e shtetit kanë përfituar familjet dhe kemi një program për 50 dyer deri në 2030, që ta dish përsëri krejt të reja, të riparuara apo të rigjeneruara me të gjithë sistemin e efikasitetit energjetik, pra me konsum energjetik shumë më të ulët.”
Rama replikon ashpër me të gjithë ata që e akuzojnë se s’ka bërë asgjë në 12 vite.
“Kush nuk do të shohë, e përsëris, është më i verbër se ai që ka probleme me shikimin, kush nuk do të dëgjojë është më i shurdhët se ai që ka probleme me dëgjimin.”
Pakënaqësinë më të madhe e tregon me një prej ndjekësve që nuk i vlerëson investimet në Shkodër që vetëm prej 2 vitesh po administrohet nga socialistët.
“Çfarë nuk kishte Shkodra nga natyra që i ka sot? Të gjitha i kishte. Po pse numri i turistëve është rritur në mënyrë të jashtëzakonshme, qysh se kur Benet Beci mori drejtimin e bashkisë Shkodër, si e shpjegon ti këtë? Apo meqë e fituam ne Shkodrën edhe natyra filloi të buzëqeshë. Mirë mo pse nuk e pranoni një gjë shumë të thjeshtë që kur Shkodrën e kishte partia jote, se dukesh qartë se ke dhe në profil qartë vulën, Shkodra ishte katastrofë.“
Ndërsa me një ndjekës nga Kosova replikon për lidhjet me politikanët serbë.
“Është një pjesë e juaja atje në Kosovë që siç themi ne këtej nga anët tona nuk mbush. Quhesh Arsim edhe flet si pa arsim, duhet ta dish që e gjithë kjo historia e miqve të mi “çetnikë”, është një budallallëk me brirë edhe thjesht të bën ty dhe cilindo që mendon e komenton si ty, shumë qesharak.”
Rama e nisi dhe e mbyll komunkimin e tij me ndjekësit virtual me një këshillë, pasi lajmëron se TikToku është përfundimisht i mbyllur si aplikacion në aparatet celulare.
“TikTok-u në smartphone është mbyllur, e kam informacion dhe e kam si këshillë, sugjerim për të gjithë ata që do të dëgjojnë fjalën VPN falas, mos i hyni asaj rruge se VPN falas janë hapja e shtegut për të humbur të dhënat që keni në telefon sepse hakerat janë aty gati t’u gllabërojnë të dhënat e telefonit dhe i them të gjithë prindërve, kujdes me telefonat sepse nëqoftëse fëmijët iu fusin VPN në telefon, iu morën në qafë.
Kujdes me telefonat dhe Tik Tok-u me VPN është hapje e rrugës për hakerim. Ok? Falas, falas dhe pastaj është një dardhë që e ka bishtin prapa shumë të madh, shumë të gjatë.
Faleminderit! Numrin 5 edhe mirë se të shihemi!”
