Prej gjashtë ditësh, 63-vjeçari Engjëll Kanani mbetet i zhdukur pranë lumit Vjosa në zonën e fshatit Kashisht, ndërsa kërkimet e intensifikuara nuk kanë dhënë ende rezultate. Ajo që e bën këtë rast edhe më enigmatik është fakti se nuk është gjetur asnjë send personal i tij, si mjetet e peshkimit, çanta apo telefoni celular.
Sipas burimeve nga vendi i ngjarjes, celulari i Kananit ka qenë i hapur për 24 orë pas zhdukjes së tij, por askush nuk u përgjigj në thirrjet e vazhdueshme të familjarëve dhe mikut të tij, i cili ishte i pranishëm atë ditë. Miku, një 64-vjeçar që ka raportuar zhdukjen, deklaroi se dy peshkatarët amatorë ishin në vende të ndryshme përgjatë Vjosës dhe kishin rënë dakord të takoheshin në një pikë të caktuar, por Kanani nuk u paraqit.
Kërkimet janë shtrirë tashmë edhe në kanalin Vjosë-Levan-Fier, që lidhet me lumin, ku familjarët dhe një ekip policie e polumbarësh po punojnë për të gjetur gjurmë të 63-vjeçarit. Krahas operacioneve të kërkimit, sektori i krimeve në komisariatin e Fierit ka nisur një hetim për të zbuluar rrethanat e zhdukjes.
Engjëll Kanani, baba i dy fëmijëve dhe banues në Berat, ishte i njohur për pasionin e tij për peshkimin. Dita e zhdukjes, e enjtja e javës së kaluar, ka sjellë shqetësim të madh për familjen dhe të afërmit e tij, të cilët janë përfshirë në përpjekjet për ta gjetur.
Policia dhe ekipet e kërkimit vazhdojnë të mbeten në gatishmëri, ndërsa shpresat për zbardhjen e ngjarjes ende nuk janë shuar.
