Kancelari gjerman, Friedrich Merz u bëri thirrje partnerëve evropianë të përshtaten shpejt me faktin se rendi i vjetër botëror po shpërbëhet me një ritëm marramendës.
Duke folur sot në Forumin Ekonomik të Davosit, Merz tha se pushtimi i Ukrainës nga Rusia shënoi fillimin e një epoke të re, por ndryshimi shkon shumë më thellë.
“Kina, me largpamësi strategjike, ka hyrë në radhët e fuqive të mëdha”, u shpreh ai.
”Shtetet e Bashkuara po sfidohen në pozicionin e tyre si poli kryesor global dhe Uashingtoni po reagon duke riformësuar rrënjësisht politikën e jashtme dhe të sigurisë”, shtoi Merz, duke iu referuar Shteteve të Bashkuara.
”Kemi hyrë në një kohë të politikës së fuqive të mëdha”, tha kancelari.
”Kjo botë e re po ndërtohet mbi pushtet, mbi forcë dhe, kur vjen puna, mbi përdorimin e forcës. Nuk është një vend i rehatshëm”, theksoi ai.
Megjithatë, sipas Merzit, bota nuk është në mëshirën e këtij rendi të ri.
”Ne kemi një zgjedhje. Mund ta formësojmë të ardhmen. Për të pasur sukses, duhet të përballemi me realitetet e ashpra dhe të përcaktojmë drejtimin tonë me realizëm të kthjellët”
