Për më shumë se një vit, Bashkimi Evropian ka mbajtur në fuqi masat ndëshkuese ndaj Kosovës, duke ndikuar kryesisht në ekonominë dhe projektet e financuara nga blloku, por pa arritur ta ndryshojë qasjen e Qeverisë Kurti. Sipas një analize të Radios Evropa e Lirë, megjithëse Prishtina dhe Parlamenti Evropian kanë bërë thirrje të vazhdueshme për heqjen e këtyre masave, BE-ja vijon t’i mbajë ato në fuqi, duke kërkuar hapa konkretë për uljen e tensioneve në veri të vendit.
Një zëdhënës i Bashkimit Evropian ka deklaruar për REL se “masat e përkohshme janë të kthyeshme”, por vetëm nëse Kosova përmbush kushtet e vendosura nga Këshilli i BE-së. Këto kushte lidhen me qetësimin e situatës në veriun e Kosovës, një zonë e banuar kryesisht nga serbë, ku tensionet janë rritur ndjeshëm që nga viti 2023.
Megjithëse BE-ja nuk ka dhënë detaje mbi projektet e pezulluara, burime nga REL raportojnë se fondet e ngrira arrijnë deri në 100 milionë euro dhe prekin sektorë të ndryshëm, nga kultura te infrastruktura. Analistët në Kosovë vlerësojnë se këto masa nuk kanë ndikuar në politikat e qeverisë, por kanë sjellë pasoja të rënda afatgjata për vendin.
Masat ndëshkuese të BE-së u vendosën në qershor të vitit 2023, pas vlerësimeve se veprimet e kryeministrit Albin Kurti kishin ndikuar në përshkallëzimin e tensioneve etnike në veri. Pavarësisht presionit ndërkombëtar, Kurti nuk ka ndryshuar qëndrim, duke vijuar zbatimin e politikave për shtrirjen e autoritetit të Kosovës në atë zonë, përfshirë ndalimin e përdorimit të dinarit serb dhe mbylljen e shumicës së institucioneve të Serbisë në veri.
Ndërkohë, Kosova mbetet pa një mekanizëm të qartë diplomatik për të negociuar heqjen e masave, pasi vendimet brenda BE-së merren me konsensus nga të 27 vendet anëtare. Deri më tani, nuk ka sinjale për një ndryshim të qëndrimit nga Brukseli, duke lënë në pritje jo vetëm institucionet e Kosovës, por edhe qytetarët e saj që ndjejnë pasojat e drejtpërdrejta të këtyre sanksioneve.
