Ministrja e Arsimit dhe Sportit uroi 15-vjetorin e pavarësisë së Kosovës me një album të vizatimeve të fëmijëve të shkollave, me tematikën e kësaj feste.
“Në këtë ditë të shënuar, zgjodha të uroj vëllezërit dhe motrat tona në Kosovë me disa nga punimet e realizuara nga nxënës të shkollave nga e gjithë Shqipëria.
Ndihem krenare për mesazhet kuptimplotë që përcjellin nxënësit tanë nëpërmjet talentit të tyre dhe është detyra jonë e përbashkët që të ushqejmë tek ata ndjenjat e atdhedashurisë, vëllazërisë dhe krenarisë kombëtare”, shkroi Kushi në rrjetet sociale.
Të gjitha këto punime të nxënësve të shkollave të Shqipërisë, do të jenë pjesë e një ekspozite të përbashkët, e cila do të çelet më datë 21 shkurt në Bibliotekën Kombëtare të Kosovës, në Prishtinë.
