Forcat ushtarake të Iranit kanë njoftuar se kanë goditur selitë e forcave kurde iraniane në veri të Irakut, duke intensifikuar sulmet ndaj rajoneve kurde si në Iran ashtu edhe në Irak.
Në një deklaratë të transmetuar nga mediat shtetërore iraniane, ushtria njoftoi se kishte sulmuar “grupe kurde që janë kundër revolucionit në Kurdistanin Irakian me tre raketa”.
Teherani po shton sulmet ndaj grupeve kurde iraniane në Irak ndërsa ka spekulime se Presidenti amerikan, Donald Trump, dëshiron që ata të bashkohen në luftën kundër Iranit, ndërkohë që vazhdojnë sulmet amerikane dhe izraelite.
Një person humbi jetën dhe tre të tjerë u plagosën në sulmet iraniane të martën dhe të mërkurën në bazat e dy grupeve të ndryshme opozitare kurde, ka konfirmuar BBC. BBC ka vizituar vendet e sulmeve.
Një bazë u godit nga një raketë balistike rreth orës 11:00, ora lokale (08:00 GMT) të mërkurën, duke plagosur katër luftëtarë kurdë Peshmerga. Njëri prej tyre vdiq më vonë nga plagët.
Një ndërtesë në bazë u shkatërrua, me rrënoja dhe metale të shtrembëruara të shpërndara në një zonë të gjerë. Një gropë e madhe në tokë ishte krijuar nga raketa.
Në një bazë tjetër, e partisë Demokratike të Kurdistanit Iranian (KDPI) BBC pa pasojat e një sulmi të dyfishtë me dron të martën, që thuhet se plagosi një civil.
Një udhëheqës i lartë politik i KDPI-së i tha BBC-së se besonte se kurdët do të fillojnë së shpejti të luftojnë brenda Iranit, pa dhënë një afat të saktë.
Ai nuk komentoi mbi raportimet se Trump kishte biseduar me udhëheqësin e KDPI-së në ditët e fundit. Një luftëtar 25-vjeçar, i quajtur Hassan dhe i armatosur me një AK-47, tha se ishte i gatshëm të shkonte në Iran për të luftuar për liri.
“Jemi më afër se kurrë”, tha ai. Rreth 25-35 milion kurdë jetojnë në një rajon malor që përshkon kufijtë e Turqisë, Irakut, Sirisë, Iranit dhe Armenisë. Ata janë grupi i katërt më i madh etnik në Lindjen e Mesme, por nuk kanë pasur kurrë një shtet të pavarur.
Rreth 10% e popullsisë së Iranit, që ka 84 milion banorë dhe është kryesisht shiite, janë kurdë, kryesisht myslimanë sunitë, që jetojnë kryesisht në pjesën veriperëndimore të vendit.
Organizata Amnesty International ka deklaruar se kurdët iranianë “kanë vuajtur prej kohësh diskriminim të thellë” dhe se “të drejtat e tyre shoqërore, politike dhe kulturore janë shtypur, po ashtu si dhe aspiratat e tyre ekonomike”.
Grupet opozitare kurde në mërgim, që kërkojnë një shtet të pavarur ose autonomi rajonale, kanë qenë vitet e fundit të angazhuara në përleshje të armatosura me forcat e sigurisë iraniane nga bazat e tyre në Kurdistanin Irakian.
