Ministri për Europën dhe Punët e Jashtme, Ilgi Hasani, u shpreh se qeveria shqiptare “mbetet e hapur dhe plotësisht e përkushtuar për promovimin e dialogut për të gjitha çështjet dypalëshe pezull” me Greqinë.
Hasani zhvilloi një intervistë për gazetën greke, “Ta Nea”, ku foli për marrëdhëniet greko-shqiptare.
Ai nuk përjashton perspektivën e Hagës për përcaktimin e Zonës Ekskluzive Ekonomike (ZEE) midis Greqisë dhe Shqipërisë, ndërsa shprehet i sigurt se të gjitha çështjet dypalëshe të pazgjidhura mund të adresohen.
“Ne marrim pjesë në këto diskutime me frymën e respektit të ndërsjellë, me qëllimin për të arritur zgjidhje të drejta dhe të qëndrueshme që pasqyrojnë interesin tonë të përbashkët për marrëdhënie të mira fqinjësore dhe stabilitet rajonal. Nëpërmjet dialogut të vazhdueshëm dhe bashkëpunimit konstruktiv, ne besojmë se është e mundur të adresohen të gjitha çështjet përkatëse në mënyrë që përputhen me rregullat ndërkombëtare – duke u bazuar në lidhjet e thella historike dhe afërsinë gjeografike që lidhin dy popujt tanë prej brezash. Këto lidhje të përhershme kanë ndihmuar në formimin e një marrëdhënieje që duhet të vazhdojë të udhëhiqet nga bashkëpunimi dhe mirëkuptimi i ndërsjellë”, u shpreh Hasani.
Sipas tij, marrëdhëniet mes dy vendeve duhet të vazhdojnë të zhvillohen me një frymë pozitive dhe progresive.
“Greqia mbetet një partner i rëndësishëm për Shqipërinë dhe ne vlerësojmë përparimin e arritur deri tani. Dy popujt tanë kanë jetuar pranë e pranë për shekuj me radhë, duke ndarë kufij, përvoja dhe shkëmbime të panumërta shoqërore e kulturore. Kjo afërsi ka krijuar një lidhje të thellë njerëzore që tejkalon politikën dhe thekson rëndësinë e zgjidhjes së të gjitha çështjeve të pazgjidhura nëpërmjet dialogut”, u shpreh Hasani.
Ministri i Jashtëm e bëri intervistën për median greke në prag të vizitës që pritet të bëjë në Athinë të martën, më 3 Qershor, ku pritet të takohet me homologun e tij, Giorgos Gerapetritis.
“Është një mundësi për të ndërtuar mbi këtë themel dhe për të riafirmuar përkushtimin tonë të përbashkët për dialog të hapur dhe konstruktiv. Duke vazhduar të angazhohemi me vullnet të mirë, besojmë se çështjet e pazgjidhura mund të trajtohen në një mënyrë që pasqyron vlerat tona të përbashkëta dhe kontribuon në stabilitetin dhe integrimin rajonal”, tha ai.
Sa i takon integrimit europian, Hasani tha se pas reformave të gjera, Shqipëria ndodhet “në një fazë vendimtare të procesit të anëtarësimit, me katër grup-kapituj negociatash që tashmë janë hapur”.
Ai theksoi se ka ardhur koha që t’i jepet një shtyrë e re procesit të Selanikut jo vetëm për Shqipërinë, por për të gjithë Ballkanin Perëndimor.
“Kjo është një recetë strategjike si për BE-në, ashtu edhe për rajonin”, tha ai.
Për ministrin Hasani, Shqipëria dhe Greqia gëzojnë një bashkëpunim të fortë në fusha të ndryshme.
Ai vlerësoi veçanërisht mbështetjen afatgjatë të Greqisë për integrimin evropian të Shqipërisë, së bashku me bashkëpunimin në energji, tregti, nisma rajonale dhe platforma shumëpalëshe.
Ministri Hasani komentoi edhe mbështetjen e emigrantëve shqiptarë për Partinë Socialiste në zgjedhjet e 11 majit.
“Pasqyron besimin e vazhdueshëm të tyre në udhëheqjen e kryeministrit Rama, përkushtimin e qeverisë për reforma thelbësore dhe vizionin tonë të përbashkët për të ardhmen evropiane të Shqipërisë. Gjithashtu, kjo thekson lidhjen e vazhdueshme midis diasporës sonë dhe përparimit demokratik dhe zhvillimor të vendit”, u shpreh Hasani./tvklan.al
