Reshjet e dendura të shiut kanë shkaktuar përmbytje në disa pjesë të Greqisë, duke lënë të paktën dy persona të vdekur, raportuan sot mediet lokale.
”Erëra deri në 140 kilometra në orë goditën Egjeun jugor”, tha një meteorolog për transmetuesin publik ERTNews, duke detyruar pezullimin e shërbimeve të trageteve.
”Një nga viktimat ishte një oficer i rojes bregdetare i cili rrëshqiti gjatë një inspektimi në një port të vogël në gadishullin e Peloponezit, ra në det dhe u rrëmbye nga valët e larta”, tha agjencia e lajmeve ANA.
”Në Athinë, një grua humbi jetën pasi u përfshi nga ujërat e rrëmbyer”, sipas ERTNews.
Në kryeqytetin grek, rrugët u shndërruan në përrenj të rrëmbyeshëm ndërsa makinat, kazanët e mbeturinave dhe mbeturinat u rrëmbyen, treguan pamje nga mediat lokale.
Autoritetet e mbrojtjes civile dërguan njoftime me mesazhe duke u kërkuar banorëve në disa rajone të qëndrojnë brenda, ndërsa shkollat u mbyllën në pjesë të mëdha të vendit.
Shërbimi kombëtar meteorologjik i Greqisë tha se stuhia pritet të vazhdojë të prekë vendin të enjten, duke përfshirë ishujt turistikë të njohur të Rodosit, Lesbosit dhe Samosit.
