Sali Berisha ka zgjedhur që ditën e sotme t’u përgjigjet disa pyetjeve të bëra nga qytetarët në rrjetin e tij social.
Një nga pyetjet i është bërë nga një profil që mban emrin Erion Braçe, duke i thënë se çfarë e bën atë të jetë i sigurt se do të fitojë në këto zgjedhje, kur bashkitë sipas tij i kanë arkat bosh dhe janë me kredi.
Berisha i është përgjigjur thënë ndër të tjera se “qeveria e ardhshme nuk do ndërtojë kurrë rrugë me 24 milionë euro, por me 2 milionë euro kilometri”.
“E vërteta është se një seri bashkish janë tërësisht të falimentuara. Por, nuk mundet kurrë një njeri të qëndrojë duarkryq përpara të keqes. Kur sheh të keqen me sy, detyra më kryesore është ta ndalosh atë. Aty ku ndalon të keqen, lind shpresa, lind mundësia.
Ka qenë viti 1992, gjithsej arka e shtetit kishte 4 milionë dollarë. 80 përqind e qytetarëve ishin të papunë. Por reforma dhe guximi për t’i ndërmarrë ato, bënë të mundur që çdo vit, të ardhurat të dyfishohen.
Unë mund t’u them ju zoti Erion, se qeveria e ardhshme nuk do ndërtojë kurrë rrugë me 24 milionë euro, por me 2, 3 milionë euro kilometri. Qeveria e ardhshme nuk do ndërtojë shkolla me 6 milionë euro, por me 700 mijë euro.
Kryeministri i ardhshëm nuk do shpenzojë 22 milionë euro me fluturime me avion me dhomë gjumi, të blejë vazo 4 milionë euro. Nuk do lejojë kurrë që ministrat të ulen në dreka dhe darka me 10 mijë euro, apo që të udhëtojë 15 rrugë me helikopter për Peshkopi.
Mundësitë janë të mëdha nëse vendosim ligjin dhe qytetarin në epiqendër të qeverisjes”, tha Berisha.
