Një ngjarje e rëndë tronditi zonën pranë “Pallatit me Shigjeta” mbrëmjen e së dielës, kur një person mbeti i vrarë pas një sulmi me armë zjarri. Viktima, një biznesmen 56-vjeçar me emrin Bujar Nasufi, u qëllua për vdekje rreth orës 20:40 teksa po kthehej për në banesë.
Sipas të dhënave paraprake, autori i krimit, i maskuar si shpërndarës picash dhe i pajisur me një armë zjarri, priti momentin kur viktima po parkonte automjetin pranë shtëpisë. Ai qëlloi gjashtë herë në drejtim të tij, nga të cilat dy plumba rezultuan fatalë. Pasi kreu krimin, agresori u largua me një motomjet në drejtim të zonës së Selitës, duke e bërë të vështirë identifikimin e tij.
Makina e viktimës është sekuestruar nga Policia Shkencore për t’iu nënshtruar ekspertizës, ndërsa hetimet janë përqendruar në pistën e një konflikti të mundshëm për çështje pronësore. Megjithatë, burimet konfirmojnë se Nasufi, i cili ishte banor i Tiranës dhe kishte tre vëllezër, nuk kishte precedentë penalë apo një histori të njohur nga autoritetet.
Ngjarja ka ngjallur shqetësim në komunitet, ndërkohë që policia po mbledh prova dhe dëshmi për të identifikuar autorin dhe motivet e sakta të sulmit. Vdekja e Nasufit është viktima e dytë për këtë vit në vend, pas rastit të Ramazan Matës në Shkodër.
