Kuvendi i Kosovës mbajti këtë të premte seancën e 20-të, në përpjekje për t’u konstituuar, tre muaj pas zgjedhjeve parlamentare të mbajtura më 9 shkurt.
Seanca dështoi sërish dhe Kosova vijon të mbetet pa Kuvend.
Për disa seanca me radhë nuk ka arritur të kalojë propozimi për formimin e komisionit për mbikëqyrjen e votimit të fshehtë për kryeparlamentar.
Partia fituese e zgjedhjeve, Lëvizja Vetëvendosje, ka vazhduar të propozojë Albulena Haxhiun për postin e kryeparlamentares, por pa mbështetjen e mjaftueshme nga partitë e tjera.
Vetë Haxhiu, në një prononcim për gazetarët, para nisjes së seancës, tha: “Jemi këtu për të konstituuar Kuvendin e Kosovës”. Vendosmëri që nuk gjeti pajtimin e 111 deputetëve të pranishëm në seancë.
As thirrja e kryediplomates së Bashkimit Europian, Kaja Kallas, e cila vizitoi Prishtinën për herë të parë, të enjten, që partitë parlamentare të bashkëpunojnë për ta zhbllokuar ngërçin politik në vend, nuk solli ndryshim.
Siç shkruan Radio Evropa e Lirë, dështimi i radhës ndodhi pak pasi disa organizata të shoqërisë civile i bënë thirrje partive “të arrijnë një marrëveshje që i jep fund bllokadës”.
Ato thanë se kriza institucionale me bllokimin e konstituimit të Kuvendit “ka kaluar çdo kufi të tolerueshëm dhe po dëmton jo vetëm Kuvendin, por edhe funksionimin e gjithë sistemit demokratik dhe institucional të vendit”.
