Presidenti i Këshillit Evropian, Antonio Costa, i ftoi shtetet anëtare që të jenë gati për të mikpritur shtete të tjera në përbërje të BE-së.
“Ne duhet të përgatitemi për zgjerimin e ardhshëm të familjes evropiane. Bashkimi Evropian është një projekt pajtimi dhe paqeje. Këto vlera janë të lidhura ngushtë me zgjerimin, duke e bërë atë investimin më të mirë gjeostrategjik që ne mund të bëjmë për të ardhmen tonë. Që nga dita e parë e mandatit tim, e kam bërë zgjerimin një nga prioritetet e mia kryesore”, tha Antonio Costa, president i Këshillit Evropian.
Costa vuri theksin tek sundimi i ligjit.
“Si strategjia e madhe më e suksesshme e Evropës, zgjerimi forcon demokracinë dhe sundimin e ligjit. Aplikimi i Ukrainës për anëtarësim ka gjeneruar një dinamizëm të ri, një moment të ri për procesin e pranimit në Bashkimin Evropian. Ky moment nuk kufizohet vetëm për Ukrainën, por shtrihet edhe në Moldavi dhe për të gjashtë shtetet e Ballkanit Perëndimor”.
Sipas presidentit të KE-së, për këtë proces duhet të respektohen kriteret, por nga ana tjetër duhet të kuptojmë ndjenjën e urgjencës për zgjerimin.
“E ardhmja e këtyre shteteve është brenda Bashkimit Evropian, duke u ofruar një anëtarësim të bazuar në meritë që siguron standardet më të larta për të gjithë. Për ta bërë zgjerimin realitet në vitet e ardhshme, duhet të ndërmarrim hapa vendimtarë. Duhet të respektojmë kriteret, por nga ana tjetër duhet të kuptojmë ndjenjën e urgjencës për zgjerimin”, tha Costa.
BE po diskuton disa mekanizma që do të mundësonin një anëtarësim të shpejtë të Ukrainës, Moldavisë, Malit të Zi dhe Shqipërisë, madje duke mos u ofruar atyre komisioner apo të drejtë vote.
