Në takimin e parë të Komitetit të Përbashkët Konsultativ Socio-Ekonomik Evropian, ambasadori i Bashkimit Evropian në Tiranë, Silvio Gonzato, theksoi se dialogu social luan një rol të rëndësishëm edhe në kuadër të negociatave.
“Dialogu social është pjesë e rëndësishme e kapitullit 3 te negociatave që do të çelet shumë shpejt. BE-në e keni në krah për t’ju ndihmuar me punësimin dhe dialogun social, përmes planit të rritjes që adreson çështjet socio-ekonomike në Shqipëri por në Ballkanin Perëndimor në tërësi”, ambasadori Silvio Gonzato.
Gonzato përmendi shqetësimet e të rinjve ndër to edhe korrupsioni.
“Të rinjtë shpesh janë të shqetësuar kanë pasiguri për punësimin gjë që sjell dëshirën për të emigruar. Kjo mund të vijë edhe prej punësimit informal ku nuk ju paguhen ditët kur nuk janë mirë me shëndet. Shqetësim tjetër është cilësia e arsimit por edhe korrupsioni sepse mungon një sistem që bazohet tek merita”, tha ambasadori Silvio Gonzato.
Kryenegociatorja Dhuka, tha se Shqipëria po përgatitet gjithnjë e më shumë për t’u integruar në tregun e punës të BE-së.
“Në lidhje me dialogun social ne jemi më pranë BE-së se në fusha të tjera. Vendet që janë bërë pjesë e BE-së kanë dëshmuar transformim të madh ekonomiko-social duke rritur cilësinë e jetës dhe standardet për qytetarët e tyre. Rajoni dhe Shqipëria janë vende me moshë të re, në kemi një treg pune të ri në moshë dhe kemi zell për të përqafuar ndryshimet teknologjike dhe mund të sjellim një kontribut shumë të mirë në treguan e punës së BE-së që lidhet me ekonominë digjitale”, tha Majlinda Dhuka.
Presidenti i komitetit ekonomik dhe social europian Oliver Röpke vlerësoi arritjet e Shqipërisë në reformat.
“Anëtarësimi në BE duhet të bazohet me merita, por metodologjia duhet të jetë graduale per shtetet kandidate dhe pikërisht këtë kemi bërë dhe komitetin tonë ekonomiko-social. Ne jemi pararojë e kësaj metodologjie në BE me krijimin e Komitetit të Përbashkët Konsultativ, një organ ky, që jo vetëm do monitorojë, por do të japë dhe këshilla së bashku me institucionet e tjera evropiane për anëtarësimin e vendeve si Shqipëria”, Oliver Röpke, Presidenti i Komitetit Ekonomik dhe Social Europian.
