Gjykata e Apelit ka marrë një tjetër kërkesë nga avokati mbrojtës i 14-vjeçarit Mario Përlleshaj, i cili kërkon një masë më të lehtë sigurie për klientin e tij. Përlleshaj ndodhet në paraburgimin e të miturve në Kavajë, pasi akuzohet për vrasjen me thikë të bashkëmoshatarit të tij, Martin Cani, pranë shkollës “Fan Noli”.
Avokati i të miturit argumenton se ngjarja ka ndodhur në kushtet e vetëmbrojtjes dhe kërkon që masa “Arrest me burg” të zëvendësohet me një masë më të butë. Megjithatë, kjo nuk është hera e parë që Apeli shqyrton një kërkesë të tillë. Më parë, gjykata ka refuzuar ankesën, duke mbetur në qëndrimin se vepra penale për të cilën akuzohet i mituri është e rëndë dhe e justifikon mbajtjen e tij në paraburgim.
Në anën tjetër, prindërit e Martin Canit i janë drejtuar ambasadës së SHBA-së në Tiranë për të kërkuar drejtësi për djalin e tyre. Tragjedia ka shkaktuar reagime të shumta, jo vetëm nga familja e viktimës, por edhe nga opinioni publik dhe shoqëria civile, e cila ka organizuar protesta të herëpashershme, duke ngritur shqetësime për sigurinë në shkolla.
Ngjarja ndodhi pas një konflikti mes të miturve, i cili dyshohet të ketë nisur edhe në rrjetet sociale. Pas përfundimit të mësimit, përplasja verbale mes adoleshentëve u përshkallëzua në një përleshje fizike, duke përfunduar tragjikisht me vrasjen e Martin Canit dhe plagosjen e shokut të tij, Luis Meçja, po 14 vjeç.
Përveç aspektit ligjor, ky rast ka shtyrë qeverinë të rishikojë përdorimin e rrjeteve sociale nga të miturit. Pas konsultimeve publike, autoritetet kanë paralajmëruar masa për kufizimin ose ndalimin e platformave si TikTok dhe Snapchat për fëmijët nën një moshë të caktuar, duke e cilësuar ndikimin e tyre si një faktor shtesë në konfliktet mes të rinjve.
Kjo ngjarje ka rikthyer debatin mbi sigurinë në ambientet shkollore, me prindër dhe organizata të shoqërisë civile që kanë kërkuar masa të menjëhershme për të parandaluar episode të ngjashme në të ardhmen. Ndër të tjera, ata kanë kërkuar një rritje të kontrolleve në hyrjet e shkollave dhe një vëmendje më të madhe ndaj ndikimit të teknologjisë dhe rrjeteve sociale në sjelljen e të rinjve.
