Policia ka arrestuar tre persona në lidhje me trafikun e armëve në Tiranë.
Bëhet fjalë për një grup kriminal të përfshirë në trafikun e armëve të zjarrit prej disa kohësh, ndërsa një armë shitej 700-800 euro.
Mësohet se ata nuk kanë lidhje me grupet e tjera të goditur muajt e fundit nga Komisariati nr. 4.
Armët e sekuestruara dyshohet se i kanë sjell nga Fieri, ndërsa po në këtë qytet po hetohen persona të tjerë që mund të jenë pjesë e grupit.
Armët do të shiteshin për llogari të grupeve të tjera kriminale dhe dyshohet se do do përdoreshin në ngjarje kriminale.
Njëri prej të arrestuarve është Ilir Zyberi, i njohur me mbiemrin Avdillari, pasi e ka ndryshuar dhe ka marrë mbiemrin e gruas.
Ai është vëllai i Fatmir Avdillarit, i njohur si Xubi, i cili u aksidentua për vdekje në bulevardin “Migjeni” në 2021-in.
Zyberi është i dënuar më herët për vrasje, si dhe i skeduar në vitin 2017 për drogë.
I njohur si një ndër anëtarët e bandës së Yzberishtit në vitet ’97’98, ka qenë i dyshuar për të paktën 20 vepra të rënda penale.
Dënimin më të rëndë prej 22 vitesh burgim, ai e mori për vrasje, duke e përfunduar disa muaj para se të arrestohej në vitin 2017.
Ai ishte dënuar për vrasjen e biznesmenit italian Stefano Rossi.
Vrasja u krye më 27 janar të vitit 1998, në momentin kur Rossi kishte tërhequr 30 milionë lireta nga banka dhe u ekzekutua vetëm 100 metra larg fabrikës së tij.
