Përfaqësuesi ligjor i Partisë Demokratike Indrit Sefa i cili përfaqëson PD-në zyrtare të grupimit të Alibeajt është paraqitur ditën e sotme në Komisionin Qendror të Zgjedhjeve për të dorëzuar kërkesën për të regjistruar Partinë Demokratike në zgjedhjet lokale të 14 majit.
Pas daljes nga ambientet e KQZ, Sekretari për Çështjet ligjore dhe zgjedhore Indrit Sefa theksoi se kjo është një praktikë e përcaktuar në kod që ndiqet nga të gjitha partitë politike.
Sefa u shpreh për mediat se ka bërë thjeshtë një veprim procedural.
“Do e vlerësojë KQZ-ja, është gjithë praktikë e përcaktuar në kod. Është e ndjekur nga shumë parti politike. Kjo është një praktikë. Është praktikë e lëshuar nga të gjithë partitë politike”, deklaroi Sefa.
Sot, datë 6 mars 2023, është afati i fundit për regjistrimin në zgjedhje të partive politike.
Sipas Kodit Zgjedhor neni 64 pika 1, për regjistrimin e partive politike në zgjedhje çdo parti politike duhet të paraqesë kërkesën për t’u regjistruar si subjekt zgjedhor në KQZ jo më vonë se 70 ditë përpara datës së zgjedhjeve.
