Grupi parlamentar i Partisë Demokratike ka rishikuar qëndrimin e tij ndaj projektligjit të propozuar nga mazhoranca socialiste për faljen e gjobave. Pasi e quajti fillimisht një nismë populiste, opozita ka paraqitur një paketë alternative të ndryshimeve ligjore, me synimin për të zgjeruar dhe përmirësuar projektin.
Paketa e demokratëve, që përmban më shumë propozime sesa vetë projektligji fillestar, kërkon të përfshijë kategori shtesë për falje detyrimesh. Konkretisht, ata propozojnë:
- Heqjen e masave administrative për punimet pa leje të realizuara për nevoja strehimi.
- Fshirjen e detyrimeve të papaguara për energjinë elektrike dhe ujin deri më 30 nëntor 2024 për shtresat në nevojë, përfshirë pensionistët, përfituesit e ndihmës ekonomike dhe personat me aftësi të kufizuara.
- Anulimin e gjobave dhe kamatëvonesave të vendosura nga Policia e Shtetit dhe Policia Bashkiake deri më 30 nëntor 2024.
- Heqjen e masave administrative dhe kamatëvonesave për mosrespektimin e afateve në procedurat tatimore dhe mospagimin e taksës së pronës deri më 30 nëntor 2024.
Gjithashtu, demokratët kërkojnë që individëve dhe bizneseve që kanë paguar gjobat dhe masat administrative përpara hyrjes në fuqi të ligjit t’u kthehen këto shuma brenda datës 31 janar 2025. Institucionet përgjegjëse duhet të realizojnë kthimin në mënyrë të plotë dhe të drejtë.
Me këto propozime, opozita synon të sigurojë që ligji të jetë më gjithëpërfshirës dhe të adresojë sfidat sociale dhe ekonomike të shtresave më të prekura. Tani mbetet për t’u parë se si mazhoranca do të reagojë ndaj këtyre sugjerimeve.
