Një 14-vjeçar është arrestuar nga policia e Vlorës pas zbulimit të një pistolete dhe rreth 130 fishekëve luftarakë, të fshehura pranë një banese. Zbulimi erdhi pas analizimit të një fotografie në celularin e të miturit, e cila ngriti dyshime dhe çoi në veprime hetimore.
Sipas Drejtorit të Policisë së Vlorës, Elidon Çela, operacioni është rezultat i një bashkëpunimi të ngushtë mes prindërve, stafeve pedagogjike dhe Policisë, të cilët kanë raportuar shqetësime për sjelljet e adoleshentëve në zonë.
“Falë një pune të kujdesshme dhe bashkëpunimit të ngushtë me psikologë, prindër dhe punonjës socialë, u arrit të zbulohej vendndodhja e armës, e cila ishte fshehur në një motomjet. Aktualisht, po hetojmë për të identifikuar personin që i ka dhënë këtë armë 14-vjeçarit,” deklaroi Çela.
I mituri është ndaluar për armëmbajtje pa leje, ndërsa hetimet për zbardhjen e rrethanave dhe burimit të armës janë në vijim.
Policia e Vlorës falënderoi qytetarët për bashkëpunimin dhe ftoi komunitetin të vijojë raportimin e çdo informacioni që mund të ndihmojë në parandalimin e veprimtarive të paligjshme, sidomos ato që përfshijnë të miturit.
Ky rast ka ngritur shqetësime të reja mbi sigurinë dhe mbikëqyrjen e adoleshentëve, duke nxitur thirrje për angazhim më të madh nga prindërit dhe institucionet arsimore.
