Partia Demokratike ka ngritur akuza të rënda ndaj Belinda Ballukut, zv.kryeministre dhe ministre e Infrastrukturës dhe Energjisë, duke e akuzuar atë si përgjegjëse për përfshirjen në aktivitete korruptive në sektorin energjetik, të cilat përfshijnë shuma të mëdha parash.
Kryetari i grupit parlamentar të PD, Gazment Bardhi, deklaroi se ka dorëzuar një kallëzim në SPAK kundër Ballukut, duke e akuzuar se ka trefishuar kostot për realizimin e një projekti energjetik fotovoltaik në Digën e Zadejës. Sipas tij, kostoja për ndërtimin e këtij projekti, kur është realizuar për sektorin privat, ka qenë rreth 3 milionë euro, ndërsa për shtetin kostoja ka kaluar 8 milionë euro.
PD ka dorëzuar dokumente në SPAK që, sipas saj, provojnë se një kompani që mori pjesë në projektin fotovoltaik të shtetit ka ofruar çmimin 365 mijë euro për megavat për projekte të ngjashme për sektorin privat, ndërsa për KESH-in, projekti i realizuar me Ballukun si ministre ka rezultuar me një kosto tre herë më të lartë, rreth 985 mijë euro për megavat. Bardhi ka kërkuar shpjegime për këtë ndryshim të madh në çmime.
Po ashtu, Bardhi theksoi se dokumentet e dorëzuara në SPAK theksojnë se Belinda Balluku dhe Ergys Verdho, si drejtor i KESH, janë njohur me këto abuzime dhe i kanë lejuar ato me qëllim. Ky është kallëzimi i dytë i bërë nga Bardhi ndaj Ballukut brenda këtij muaji, pas akuzave të mëparshme për një skemë korruptive lidhur me shitjen dhe blerjen e energjisë nga KESH, ku sipas PD-së, dëmi për buxhetin e shtetit arrin deri në 180 milionë euro për çdo vit.
