Deputetja e Partisë së Lirisë, Monika Kryemadhi, ka apeluar kundër vendimit të Gjykatës së Posaçme për sekuestrimin e dy vilave në zonën e Kodra e Diellit. Ajo ka njoftuar se, pas marrjes së vendimit nga Apeli, do ta ankimojë atë në Gjykatën e Lartë, duke kërkuar një shqyrtim të mëtejshëm të çështjes. Deputetja e PL u paraqit të hënën para SPAK-ut, për të përmbushur masën “detyrim paraqitje”, të caktuar nga gjykata.
Në një prononcim për mediat, Kryemadhi shprehu pakënaqësinë e saj për procesin, duke e cilësuar si jo profesionale dhe të panevojshme. Ajo theksoi se kontrolli në banesën e saj ishte bërë në mënyrë të dyshimtë, dhe se ky akt mund të çojë në shkelje të të drejtave të njeriut dhe pronës, duke paralajmëruar se çështja mund të përfundojë në Gjykatën Europiane të të Drejtave të Njeriut në Strasburg.
E pyetur për pjesëmarrjen në protestën e thirrur nga Partia e Lirisë më 6 dhjetor, Kryemadhi theksoi se nuk është më aktive në politikë dhe se ka vendosur të fokusohet në një profesion tjetër. Ajo u shpreh se është e vendosur të ndihmojë në zbulimin e padrejtësive të gjyqtarëve dhe prokurorëve që, sipas saj, janë të lidhur me ish-kryeministrin Sali Berisha.
Gjithashtu, Kryemadhi konfirmoi se nëna e saj, Fatime Kryemadhi, po hetohet nga Prokuroria e Posaçme, ndërkohë që SPAK ka vendosur në sekuestro dy vilat në pronësi të deputetes Monika Kryemadhi dhe nënës së saj.
