Pas shpërthimit të së premtes mbrëma që dëmtoi kanalin e ujit Ibër-Lepenc, kryeministri i Kosovës, Albin Kurti, e akuzoi Beogradin për përfshirje në aktin terrorist. Sipas tij, ky sulm kishte për qëllim të dëmtonte Kosovës dhe të pengonte përparimin e saj. Në përgjigje, presidenti serb, Aleksander Vuçiç, hodhi poshtë akuzat dhe theksoi se Serbia nuk ka lidhje me këtë sulm, duke shtuar se një hetim i brendshëm është në zhvillim.
Vuçiç, në një konferencë për shtyp në Beograd, e përmendi këtë ngjarje si një tentativë për të ngadalësuar procesin e integrimit evropian të Serbisë. Sipas tij, qëllimi i sulmit ishte që të dëmtonte Serbinë në prag të hapjes së kapitujve për integrim dhe të shpallte Lista Serbe si organizatë terroriste. Vuçiç shtoi gjithashtu se, sipas tij, lënda shpërthyese e përdorur ishte një eksploziv ushtarak serb, të cilin ai dyshonte se mund të ishte konfiskuar gjatë bastisjeve të policisë së Kosovës.
Ministri i Brendshëm i Kosovës, Xhelal Sveçla, kishte deklaruar një ditë më parë se lënda shpërthyese e përdorur ishte e vështirë të gjendej në tregun e zi dhe mund të ishte marrë vetëm nga depo të ushtrisë. Po ashtu, Vuçiç theksoi se Kurti kishte kërkuar lejen e KFOR-it për vendosjen e Forcave të Sigurisë së Kosovës në veri të Kosovës pas shpërthimit. Ai shtoi se po e pyeste NATO-n dhe KFOR-in nëse kjo ishte e vërtetë, duke aluduar për tensionet mbi kontrollin e veriut të Kosovës.
Vendosja e FSK-së në veri është e pamundur për shkak të një marrëveshjeje të vitit 2013 ndërmjet Kosovës dhe NATO-s, ku thuhet se forcat e sigurisë të Kosovës nuk mund të futen në ato zona pa pëlqimin paraprak të KFOR-it.
