Përmes ambasadorit Jeff Hovenier, Shtetet e Bashkuara të Amerikës shprehën dënimin e tyre të ashpër për shpërthimin në kanalin e furnizimit me ujë nga liqeni i Ujmanit, në veri të Kosovës. Në një deklaratë, Hovenier theksoi reagimin e fortë të Washingtonit ndaj sulmit të 29 nëntorit, i cili ka shkaktuar dëme të mëdha në një kanal kyç për furnizimin me ujë të Kosovës dhe për funksionimin e termocentraleve të vendit. Ambasada amerikane dënoi ashpër këtë akt të dhunshëm dhe shprehu mbështetje të plotë për hetimin e tij, duke ofruar asistencë për Qeverinë e Kosovës në identifikimin dhe ndëshkimin e autorëve të këtij sulmi kriminal.
Gjithashtu, ambasadori Hovenier ka shprehur dënimin ndaj sulmeve të tjera të dhunshme, përfshirë ato me granata në stacionin policor të Zveçanit dhe në ndërtesën e komunës së Zveçanit, duke theksuar se këto veprime të dhunshme nuk janë të pranueshme në një shoqëri demokratike dhe se ata që qëndrojnë pas tyre duhet të mbajnë përgjegjësi.
Po ashtu, shefi i Zyrës së Bashkimit Evropian në Prishtinë, Aivo Orav, ka dënuar sulmin në kanalin e ujit në Zubin Potok, i cili la pjesë të Kosovës pa furnizim me ujë. Orav shtoi se Bashkimi Evropian ka ofruar mbështetje autoriteteve të Kosovës dhe theksoi se ngjarja duhet të hetohet dhe që ata që janë përgjegjës duhet të përballen me drejtësinë.
Në reagimin e saj, Ambasada e Italisë në Kosovë gjithashtu ka shprehur mbështetje për Kosovën në përpjekjet e saj për të hetuar dhe ndëshkuar përgjegjësit e këtij sulmi.
