Armëpushimi midis Izraelit dhe grupit të armatosur libanez Hezbollah nisi ditën e sotme pasi të dyja palët pranuan një marrëveshje të ndërmjetësuar nga SHBA dhe Franca.
Ushtria e Libanit, e ngarkuar me sigurimin e zgjatjes së armëpushimit, tha se po përgatitej të vendoste në jug të vendit, një rajon që Izraeli e bombardoi rëndë në betejën e tij kundër grupit militant të mbështetur nga Irani, së bashku me qytetet dhe qytezat lindore dhe bastionet e Hezbollahut në periferitë jugore të Bejrutit.
Ushtria kërkoi që banorët e fshatrave kufitare të vonojnë kthimin në shtëpi derisa ushtria izraelite të tërhiqet.
Izraeli tha se identifikoi operativët e Hezbollahut që po ktheheshin në zonat afër kufirit dhe kishte hapur zjarr për t’i parandaluar ata që të afroheshin. Marrëveshja, e cila premton t’i japë fund një konflikti përtej kufirit izraelito-libanez që ka vrarë mijëra njerëz që kur u ndez nga lufta e Gazës vitin e kaluar, është një arritje për SHBA-në në ditët e fundit të administratës së Presidentit Joe Biden.
Pakti ka të ngjarë t’i mundësojë Izraelit të fokusohet më nga afër në konfliktin në Gazën e shkatërruar, ku është zotuar të shkatërrojë armikun e tij prej kohësh, grupin islamik palestinez Hamas, i cili udhëhoqi sulmet e 7 tetorit 2023 ndaj komuniteteve izraelite.
Kryeministri izraelit Benjamin Netanyahu, thotë se është krenar për “qëndrueshmërinë” e shfaqur nga izraelitët që jetojnë në veri dhe thotë se Izraeli do t’i kthejë qytetarët e veriut në shtëpi.
Netanyahu thotë gjithashtu se qeveria e tij është e përkushtuar për kthimin e pengjeve të mbetura nga Gaza, ndërsa theksoi se vendi i tij është i përkushtuar të “përfundojë shkatërrimin e Hamasit”.
