Struktura e Posaçme Antikorrupsion (SPAK) ka bërë njoftimin e parë zyrtar lidhur me operacionin antidrogë të zhvilluar mbrëmjen e kaluar në disa zona të vendit. Në pranga kanë rënë 10 persona, 3 prej të cilëve nga vendet e Amerikës Latine. Në fshatin Qerekë të Fushë Krujës, njofton Prokuroria është zbuluar dhe sekuestruar një laborator kokaine. Ndërsa në Tiranë dhe Durrës janë identifikuar ambiente ku magazinohej droga.
Por si funksiononte grupi kriminal i kokainës?
“Nga të dhënat hetimore, rezulton se ky grup vepron si një rrjet ndërkombëtar kriminal, duke bashkëpunuar me organizata kriminale në Amerikën Latine për të trafikuar kokainën drejt Shqipërisë dhe vendeve të Bashkimit Evropian. Në vend, ata përdornin një laborator dhe ambiente ndihmese për ekstraktimin e drogës nga “lëkurë gjedhi të kriposur”, përpunimin e saj përpara se ajo të trafikohej në tregjet e destinuara. Struktura e grupit përfshinte shtetas nga disa qytete të vendit, role të mirë përcaktuara, duke përfshirë financues, transportues, përpunues, dhe shpërndarës.
Ky rrjet shfaqte një bashkëpunim efikas mes ekspertëve të huaj me përvojë dhe elementëve lokalë të mirë-organizuar, duke krijuar një mekanizëm funksional dhe shumëdimensional të aktivitetit kriminal.
