Një 24-vjeçar është arrestuar në Tiranë, pasi në banesën e tij u zbuluan 344 kuti me lëndë piroteknike të dyshuara si të kontrabanduara, me vlerë rreth 40 mijë euro.
Policia e Tiranës bëri të ditur se arrestimi u krye në kuadër të operacionit të koduar “Fireworks”, pas informacioneve të siguruara në rrugë operative për magazinimin e sasive të konsiderueshme të lëndëve piroteknike në një banesë, me dyshimin se do të përdoreshin për qëllime të kundërligjshme.
Gjatë kontrollit në katin e parë të banesës së shtetasit E. R., në rrugën “Jargavani”, u gjetën dhe u sekuestruan 344 kuti me lëndë piroteknike të llojeve të ndryshme.
Sipas Policisë, dyshohet se 24-vjeçari ua furnizonte këto lëndë personave të maskuar dhe të dhunshëm gjatë protestave të tri ditëve të fundit.
Ndërkohë, vijojnë kontrollet dhe veprimet hetimore për identifikimin e personave të tjerë të dyshuar si të përfshirë në këtë veprimtari të paligjshme, si dhe për dokumentimin e plotë ligjor të rastit.
Materialet procedurale i janë referuar Prokurorisë së Tiranës për veprime të mëtejshme.
