Kanadaja ka vendosur sot kundërtarifa ndaj mallrave amerikane me vlerë rreth 20 miliardë dollarë, duke përshkallëzuar më tej konfliktin tregtar mes dy vendeve fqinje.
Masat e reja hynë në fuqi në mesnatë sipas orës lokale dhe janë hartuar si përgjigje ndaj tarifave të vendosura nga administrata e presidentit amerikan Donald Trump.
Otava ka vendosur tarifa në masën 15, 25 dhe 50 për qind për një sërë produktesh amerikane. Në listën e mallrave të prekura përfshihen çeliku, produktet e qumështit, pajisjet, makineritë bujqësore, produktet e industrisë së letrës dhe pajisjet elektronike.
Vendimi i Kanadasë vjen pas dështimit të negociatave tregtare dypalëshe në fund të gushtit.
Pas ndërprerjes së bisedimeve, administrata Trump vendosi tarifa deri në 50 për qind ndaj disa prej importeve kryesore kanadeze, duke përfshirë çelikun, aluminin, lëndën drusore dhe komponentët e automjeteve.
Autoritetet kanadeze kanë sqaruar se kundërtarifat do të aplikohen vetëm ndaj produkteve me origjinë nga SHBA-të.
Mallrat amerikane që ishin tashmë në tranzit në momentin e hyrjes në fuqi të masave nuk do të preken.
Përplasja tregtare mes dy vendeve është intensifikuar ndjeshëm gjatë administratës Trump, me vendosjen e njëpasnjëshme të tarifave dhe kundërmasave nga të dyja palët.
Presidenti amerikan ka kritikuar vazhdimisht deficitin tregtar me Kanadanë, duke e përdorur atë si një nga argumentet kryesore për vendosjen e tarifave ndaj importeve kanadeze.
