Deputetja e PS, Elisa Spiropali, ka reaguar përmes një postimi të gjatë në rrjetet sociale, pas raportimeve të fundit për përplasje dhe tensione brenda Partisë Socialiste, në mes të skandalit që lidhet me hetimet e SPAK dhe akuzave ndaj ish-zv/kryeministres Belinda Balluku.
Në mesazhin e saj, Spiropali thekson se prej ditësh emri i saj është përmendur në emisione dhe forume publike, shpesh – sipas saj – jo mbi bazën e fakteve, por si pjesë e interpretimeve të ndryshme.
“Ajo që mungon është qetësia për të kuptuar se jo çdo gjë që ndodh kërkon një rrëfim të menjëhershëm publik,” shprehet ajo, duke sqaruar se heshtja e saj nuk është mungesë reagimi, por një zgjedhje e vetëdijshme.
Në vijim, Spiropali e zgjeron reagimin përtej aspektit personal, duke ngritur shqetësime për klimën politike dhe shoqërore në vend. Ajo flet për një model që, sipas saj, po normalizon arrogancën dhe abuzimin, duke i kthyer ato në forma të pranueshme.
Sipas saj, ky model ndikon edhe në funksionimin e partive politike, duke zbehur konkurrencën e ideve dhe duke favorizuar përshtatjen ndaj strukturave të pushtetit më shumë sesa meritën.
Spiropali paralajmëron se mungesa e debatit të hapur nuk sjell stabilitet, por krijon tension të padukshëm, ndërsa thekson se në një klimë të tillë edhe meritokracia rrezikon të mbetet vetëm një parim formal.
Duke iu referuar edhe diskursit për integrimin europian, ajo nënvizon se Europa nuk duhet të përdoret si retorikë politike, por si një sistem vlerash që kërkon reflektim dhe përputhje në praktikë.
Në përfundim, Spiropali lë të kuptohet se reagimi i saj lidhet me një situatë më të gjerë se sa thjesht individi, duke theksuar se në një kohë kur gjithçka kërkon reagim të menjëhershëm, heshtja mund të jetë një formë më e fortë komunikimi.
