Kryetari i Partisë Demokratike, Sali Berisha, u paraqit këtë të hënë në ambientet e Prokurorisë së Posaçme kundër Korrupsionit dhe Krimit të Organizuar (SPAK), në zbatim të masës së sigurisë “detyrim paraqitje” në lidhje me dosjen “Partizani”.
Berisha u prit nga një grup mbështetësish dhe disa deputetë të Partisë Demokratike para ambienteve të institucionit.
Ish-kryeministri përballet me akuzë për korrupsion, ndërsa dhëndri i tij, Jamarbër Malltezi, dhe biznesmeni Fatmir Bektashi akuzohen për përfshirje në korrupsion dhe veprime të paligjshme që lidhen me pastrimin e parave.
Pas daljes nga SPAK, Berisha deklaroi për mediet se kishte lënë një mesazh në SPAK.
“Drejtësia dhe ligji mund të vonojnë, por nuk harrojnë”, u shpreh ai.
Gjatë prononcimit të tij, Berisha ngriti pretendime për mënyrën e funksionimit të institucioneve të drejtësisë.
Berisha deklaroi se Prokurori i Përgjithshëm, KLGJ dhe ILD nuk kanë bërë asnjë deklaratë publike në mbrojtje të institucioneve gjatë kritikave të Ramës, duke i cilësuar drejtuesit e tyre si “zyrtarë që nuk guxojnë të mbrojnë institucionet”.
Po ashtu Berisha preku edhe çështjen e gjyqtares Irena Gjoka.
“Prokurorit të Përgjithshëm iu deshën dy vite për të nxjerrë një vendim për një çështje që, sipas meje, ishte e qartë që në javët e para”, tha Berisha.
Kreu i PD-së foli edhe për protestën e planifikuar të opozitës më 22 mars, duke e cilësuar
ditë frymëzimi për shqiptarët, pasi është dita, sipas tij, kur de facto me votë rrëzuan diktaturën më të egër që kishin njohur.
“22 marsi është dita në të cilën shqiptarët ftohen në kryengritjen e tyre më të fuqishme paqësore që ka njohur Tirana dhe Shqipëria”, deklaroi Berisha duke shtuar se dyert e Evropës nuk mund t’i hapë askush veç shqiptarëve.
I pyetur në lidhje me ndryshimet lidhore të propozuara nga amzhoranca, Berisha tha se ato janë ndryshime antikushtetuese.
“Ne nuk bashkojmë kurrë asnjë votë me Edi Ramën. Kjo të jetë shumë e prerë”, përfundoi Berisha.
