Dick Cheney, nënpresidenti republikan i Shteteve të Bashkuara gjatë dy mandateve të George W. Bush (2001–2009) dhe një nga figurat më me ndikim të politikës amerikane, ka ndërruar jetë në moshën 84-vjeç, për shkak të komplikimeve nga pneumonia dhe sëmundjet e zemrës dhe enëve të gjakut, njoftoi familja e tij, sipas CNN.
Familja e përshkroi Cheney-n si një “njeri të madh dhe të mirë” që u mësoi fëmijëve e nipërve dashurinë për vendin dhe jetën me guxim e nder. Ai jetoi shumë vite pas një transplanti zemre në vitin 2012, të cilin e quante “dhurata e jetës”.
Cheney u konsiderua për dekada si një figurë e fuqishme e konservatorizmit amerikan dhe një nga arkitektët e “luftës kundër terrorizmit” pas sulmeve të 11 shtatorit 2001. Ai luajti rol vendimtar në vendimin për të pushtuar Irakun, një luftë që më pas u kritikua gjerësisht si e bazuar në informacione të gabuara.
Në vitet e fundit, ai u distancua nga Partia Republikane për shkak të kritikave të forta ndaj Donald Trump, të cilin e quajti “kërcënimi më i madh për republikën.” Në zgjedhjet presidenciale të vitit 2024, Cheney votoi për demokraten Kamala Harris, në shenjë kundërshtie ndaj drejtimit populist të partisë së tij.
Para nënpresidencës, Cheney kishte shërbyer si sekretar i mbrojtjes, shef i stafit në Shtëpinë e Bardhë dhe kongresmen nga Wyoming, duke lënë pas një trashëgimi politike të fuqishme, por shpesh të debatueshme, në historinë amerikane.
