Gjatë 24 orëve të fundit, Policia e Shtetit ka zhvilluar një operacion mbarëkombëtar ku në fokus ka qenë lirimi i hapësirave publike.
Nga aksioni, i cili mban të njëjtin emër me qëllimin e tij “Hapësirat publike”, janë arrestuar dhjetë persona ndërsa janë proceduar 123 për zaptim të hapësirave publike, të shfrytëzuara në mënyrë të paligjshme për parkingje ose lavazhe.
Rastet më të shumta janë zbuluar në Tiranë, 78 të tilla që kanë përfunduar me 10 të arrestuar dhe 68 të proceduar. Gjithashtu janë evidentuar edhe 45 raste të parkimeve të gabuara që pengonin qarkullimin e lirë të makinave dhe qytetarëve.
“Konkretisht: 78 raste në Tiranë me 10 të arrestuar dhe 68 të proceduar; 16 raste në Shkodër me 16 shtetas të proceduar; 11 raste në Lezhë me 11 të proceduar; 6 raste në Korçë me 6 të proceduar; 6 raste në Fier e Lushnjë me 6 të proceduar; 4 raste në Vlorë e Sarandë me 4 të proceduar; 4 raste në Dibër me 4 të proceduar; 3 raste në Elbasan me 3 të proceduar; 2 raste në Berat me 2 të proceduar; 2 raste në Durrës me 2 të proceduar dhe 1 rast në Gjirokastër me 1 të proceduar.Gjithashtu, u evidentuan 45 raste të parkimeve të gabuara që pengonin qarkullimin e lirë të mjeteve apo qytetarëve, nga të cilat: 37 në Tiranë, 3 në Elbasan, 2 në Fier, 2 në Kukës, 1 në Durrës. Po ashtu, janë konstatuar 3 raste të punësimit të paligjshëm”, njoftoi policia.
Uniformat blu paralajmërojnë se aksioni kundër pushtimit të hapësirave publike dhe informalitetit do të vijojë intensivisht në të gjitha qarqet e vendit.
